Iloilo City – Gin-athag sang Iloilo City Police Office nga wala gina-recycle ang mga na-confiscate nga droga sa mga ginpatigayon nga drug buy-bust operations.
Sa syudad sang Iloilo, nagdangat na sa masobra P6 million ang balor sang illegal drugs nga na-confiscate sang talatapan subong nga tuig.
Sa interview sang Bombo Radyo kay Police Colonel Joeresty Coronica, officer-in-charge sang Iloilo City Police Office, iya ginpahayag nga diretso nga gina-turnover ang narekober nga illegal drugs sa Regional Forensic Unit kun sa diin, nagaagi ini sa standard operating procedures.
Suno kay Coronica, sa tion nga mapasa na sa crime laboratory sang Regional Forensic Unit ang droga, ang resulta sang sample ang gamiton sa hearing pinaagi sa pag-presentar sang chemist.
Ang pagpagwa sang recovered items nagikan sa laboratory ang indi madali bangud nga madamo sang security measures nga ginasunod kag ang mga chemist lamang ang may access sini.
Samtang, ginpahayag sang natungdan nga matapos ang madinalag-on nga mga operasyon batuk sa illegal drugs sa syudad, naga amat-amat naman balik ang pagsalig sang mga pumuluyo sa mga kapulisan.
Nagalaom naman si Coronica nga ma-sustain kag mapasanyog sang Iloilo City Police Office ang performance sini bangud nga mangin wala ini pulos kun wala man sang pagsalig ang mga pumuluyo sa ila.
