ILOILO CITY – Mangin sentro sang Local Development Council Meeting sa Lunes, Nobyembre 18, ang tuhoy sa mga wala natapos-tapos nga mga proyekto sa syudad sang Iloilo.
Sa interview sang Bombo Radyo kay Iloilo City Councilor Ely Estante, chairman sang Project Monitoring Council, iya ginpahayag nga katungdanan sang nasambit nga komitiba nga hibaluon ang status sang tagsa ka proyekto nga ginapatigayon.
Ang Project Monitoring Council suno kay Estante ang natukod paagi sa executive order 98 ni Iloilo City Mayor Jerry Treñas sa diin lakip sa mga miyembro amo ang City Engineer’s Office, City Planning Office, mga Association of Barangay Captain president, City Department of Interior and Local Government kag Non-Government Organizations.
Sa pinakaulihi nga Biyernes sang tagsa ka bulan, nagapatigayon sang pagsinapol ang komitiba kag gina-istoryahan ang tuhoy sa mga status sang pending nga proyekto kag kun paano ini matapos gilayon.
Sa maabot nga Lunes, igapatawag suno sa natungdan ang mga kontraktor agud nga magpaathag kun nga-a tubtub subong, wala pa sa gihapon matapos-tapos ang proyekto kasubong sang drainage system kag road constructions.
Katuyu-an man sang pagsinapol amo nga mahibalu-an kun ano ang problema kag kun paano ini masolbar sa labing madali nga tion.
