SINGAPORE – Paghatag sang maayo nga bwas damlang kag pangabuhi sa iya anak ang nagtulod sa isa ka Overseas Filipino Worker (OFW) nga magpadulong sa luwas sang pungsod.
Sa interview sang Bombo Radyo kay Elaine Legaspi Magnetico, sang Maasin Iloilo kag subong naga trabaho bilang caregiver sa Singapore, iya ginpahayag nga lima ka tuig na siya nga wala nakapauli sa ila balay.
Suno kay Magnentico, 29 anyos siya sang nagbiya sa Pilipinas agud mag trabaho sa luwas sang pungsod sa diin una siya nga nagpadulong sa Dubai.
Matapos sini, nagpauli siya sa Pilipinas kag nagtinir sang isa ka tuig kag nagpadulong naman sa Singapore.
Apang subong nga may pandemya, indi malikawan nga magbatyag sang mga OFW sang kapigaduhon.
Suno kay Magnetico, Abril sang ginpa stay at home sila kag Hulyo na sang ginpasugtan sila nga makagwa.
Indi man suno sa natungdan mahimo maglapaw sa lima ka tawo ang mahimo mag-updanay bangud dakpon sila sa paglapas sa quarantine protocol.
May yara naman sila sang tagsa ka mga QR code agud mahapos ang contact tracing sa tion nga may mag positibo sa ila ginpadulungan nga lugar.
Samtang ang madakpan naman nga wala nagasuksok sang face mask sa pampubliko nga lugar ang multahan sang 300 Singapore dollars ukon masobar 10,000 pesos.
Sa pihak sang naagyan nga pagtilaw sa kabuhi, ginpasigurado ni Magnetico nga indi siya mag surrender para sa iya pamilya.
