Gindula sang Iloilo City Police Office (ICPO) ang kahangawa sang publiko nga may abduction incidents nga nagakatabo sa syudad sang Iloilo.
Ini kasunod sang naglapta nga impormasyon nga may duha ka persona nga missing halin pa sang nagligad nga Hulyo 13 kag na-report sa bahin sang Lapaz Police Station.
Apang kahapon, Hulyo 18, napahibalo sa pulis nga wala gin-abduct ang 18-anyos kag 15-anyos nga mag-utod kundi nagatinir lang sa isa ka subdivision sa Pandac, Pavia.
Sa impormasyon nga gintuad mismo sang pamilya sa Bombo Radyo, may gamay lang nga sunggod nga natabo rason nga naghalin ang mag-utod sa ila nga balay sa syudad; apang gin-off nila ang ila nga cellphone rason nga nadulaan sang kontak ang ila nga ginikanan.
Nagdangop naman ang mga ginikanan sa pulis kag sa mga himata rason nga naglapta ang balita nga missing ang duha ka bata.
Sa interview sang Bombo Radyo kay ICPO director Police Col. Leo Batiles, iya ginpahayag nga luyag siguraduhon sang pulis nga wala sang naga-tuhaw nga grupo nga nagapang-abduct ukon nagapang-kidnap sa syudad.
Sa bulig sang La Paz Police Station, natigayon man nga nadala sa police station ang duha kag nabalik sa ila nga mga ginikanan.
