AJUY, ILOILO – Hugot nga nagapanindugan ang amay sang menor de edad nga angkas ukon kaupod ni Adonis Hontiveros Jr., ang lalaki nga gintiro sang mga pulis sa ginapahayag checkpoint nga natabo sa Zerrudo, Sara, Iloilo.
Sa interview sang Bombo Radyo kay George Billones, iya ginpahayag nga siya ang ginkadtoan ni Hontiveros kaupod ang iya anak sa ospital sa Sara.
Suno kay Billones, siya ang makapamatuod nga wala sang armas si Hontiveros baliskad sa pahayag sang 2nd Iloilo Provincial Mobile Force Company, nga nag-una palupok sa tatlo ka mga pulis nga sanday Patrolman Christopher Paclibar, Police Corporal John Michael Parsia kag Police Corporal Alfredo Bartulo.
Santu man sa panaysayon sang anak ni Billones nga kaupod ni Hontiveros, wala sang checkpoint nga ginpatigayon bangud nakalampas na sa headquarters sang 2nd Iloilo Provincial Mobile Force Company kag nagbalik lamang ang biktima agud nga magbakal sang pagkaon.
Pahayag pa ni Billones, ginlagas sang mga pulis sanday Hontiveros kag ginkulbaan ang iya anak rason nga naglumpat ini nagikan sa motorsiklo sang biktima.
Dugang pa sang natungdan, mahimo nga nasal-an lamang sang mga pulis sanday Hontiveros nga nagasunod sa angkar-angkar sang tatlo ka mga pulis nga ginapahayag naghalin sa Concepcion, Iloilo sa diin natigayon ang isa ka buy bust operation.
Nahibaluan nga sini nga semana magapasaka na sang kaso kriminal ang pamilya Hontiveros sa tatlo ka mga pulis.
