Ginbasura sang House of Representatives ang ginfile nga impeachment complaints batok kay Presidente Ferdinand “Bongbong” Marcos Jr. matapos makita sang Committee on Justice nga ini indi “sufficient in form” kag labi na gid nga “insufficient in substance.”
Sa interview sang Bombo Radyo kay Dr. Janette Garin, deputy speaker sang House of the Representative, iya ginpahayag nga wala sang basehan kag wala sang ebidensya para itulod ang Presidente sa kaso.
Suno pa kay Garin, base sa komitiba, wala sang direkta nga ebidensya nga nagatudlo nga may personal nga kahilabtanan ang Presidente sa mga alegasyon nga ginpahayag sa reklamo.
Dugang pa sini nga wala sang beripikado nga pruweba, kag kadam-an sang mga gin-attach nga ebidensya halin lamang sa social media posts kag pila ka online news articles.
Ginpahayag pa ni Garin nga ang mga alegasyon nga ginpasibangod sa Presidente nga may gingamit ini nga pondo, wala sang klaro nga pruweba kag naga-base lamang sa online claims.
Amo man ang isyu may kaangtanan sa wala pag-veto sang Presidente, nga indi makabig nga basehan para sa impeachment.
Tungod diri, wala sang kongresista nga nag-endorso sang impeachment complaint, gani indi ini nakaabot sa masunod nga lebel sang proseso.
Ang resolusyon sang kaso nagakahulugan man sang isa ka tuig nga ban sa pagfile liwat sang pareho nga impeachment complaint.
Suno kay Garin, pareho lamang ang iga-agyan nga proseso sang impeachment complaint batok kay Marcos sa ginfile man batok sa Bise Presidente.
Ginpahayag man ni Garin nga sa pagtapos sang resolusyon nagahatag ini sang maayo nga panugod sa administrasyon kag magapahanugot ini nga matutukan sang gobyerno ang paghatag sang serbisyo sa pungsod.
Lakip na diri ang mga programa nga maga-uswag sang ekonomiya, magapabaskog sang trabaho, kag magapadayon sa ginatawag nga “back to work” nga direksyon sang administrasyon.
