Wala sang border restriction sa probinsya sang Iloilo kag syudad sang Iloilo apisar nga ipa-idalom na sa ‘GCQ’ ang syudad sa Agosto 16

Wala sang border restriction sa bahin sang probinsya kag syudad sang Iloilo apisar nga ipa-idalom na sa General Community Quarantine (GCQ) ang syudad umpisa Agosto 16.

Sa interview sang Bombo Radyo kay Iloilo Gov. Arthur Defensor Jr., iya ginpahayag nga indi dako ang adjustments nga pagahimuon sang probinsya sa diin ginaplastar pa niya sang maayo ang executive order nga mahimo isapubliko sa Lunes, Agosto 17.

Suno kay Defensor, wala sang pagpangudal nga himuon sa bahin sang syudad sang Iloilo apang limitahan lang ang mga tawo nga nagasulod sa mga kabaranggayan sa probinsya.

Dugang pa sang gobernador, konektado ang ekonomiya sang syudad kag probinsya sang Iloilo sa diin indi ini mahimo nga i-separar.

Nahibaluan nga naga-isahanon lang ang syudad sang Iloilo sa Western Visayas nga ipa-idalom sa GCQ umpisa Agosto 16 tubtob Agosto 31.