Indi na kinahanglan pa nga magpatuman sang border restriction ang probinsya sang Iloilo sa Negros Occidental.
Sa interview sang Bombo Radyo kay Iloilo Governor Arthur Defensor Jr., iya ginpahayag nga apisar nagataas ang kaso sang COVID-19 sa Negros Occidental, kumpiyansa ini nga ginasunod sang maayo sang nasambit nga probinsya ang insakto nga health protocols kag containment measures.
Suno kay Gov. Defensor, kinahanglan nga mapabilin ang Modified General Community Quarantine (MGCQ) status sang probinsya rason nga kinahanglan mas pabaskugon pa ang mga pagsulundan nga ginahimo.
Sa isa ka tuig nga pagpanilag, sang Disyembre 2020 nga figure sang mga COVID-19 cases sa probinsya, mahimo na ini makabig nga new normal apang pagkatapos sang mga holiday, madamo nga mga social gatherings ang natabo rason nga nagdugang ang mga kaso sang virus.
Pahayag sang gobernador, ang pagpaguwa sang executive orders nga nagapa-untat sa mga pagtililipon ang pamaagi agud nga mapabilin ang status sang probinsya.
Sa subong, padayon nga nagahanda ang Iloilo Provincial Government pananglitan nga magtimbuok ang kaso sang COVID-19.
Mahimo suno kay Defensor, maabot subong nga semana ang 6,000 doses sang COVID-19 vaccines sa probinsya sang Iloilo.
