ILOILO CITY – Ginpamatukan sang pila ka mga punong barangay sa siyudad sang Iloilo ang mando ni Mayor Jed Patrick Mabilog nga indi paghatagan sang permit ang aktibidad sa fiesta sang mga barangay kun indi pa ang mga ini madeklarar nga drug-cleared barangays.
Ginpahayag sa Bombo Radyo ni Punong Barangay Sumakwel Nava sang Libertad, Lapuz nga indi siya magsunod sa nasambit nga mando sang alkalde kag wala makapugong sang ila fiesta celebration.
Ginpanindugan ni Nava nga trabaho sang pulis kag PDEA nga tinluan ang barangay sa iligal nga droga kag indi ini dapat ipasa sa mga barangay kapitan.
Pero una na ginpahayag sa Bombo Radyo ni Liga ng mga Barangay president Reyland Hervias nga suportado sang liga ang tikang sang alkalde.
Ginpaguwa naman sang Business Permit and Licensing Office ang mga aktibidad sa fiesta nga kinahanglan ang special permit.
Lakip na diri ang binayle, peryahan, mga koronasyon kag iban pa nga contests.
Ang nasambit nga tikang sang alkalde ang ginapatihan bangud sang sulit-sulit nga pagtawag ni Presidente Rodrigo Duterte sa siyudad sang Iloilo bilang “most shabulized city” kag “bedrock of drugs”.