Naga-guwa sa imbestigasyon nga wala sang foul play kundi aksidente lamang ang natabo nga sunog sa Barangay Dalusan, Maasin, Iloilo kun sa diin tatlo gid ka mga menor de edad nga mag-utod ang nagkalamatay.
Ini ang sandig sa collaborative investigation sang Maasin Municipal Police Station kag Bureau of Fire Protection (BFP) – Maasin.
Sa interview sang Bombo Radyo kay Police Major Jose Nemias Pamplona, hepe sang Maasin Municipal Police Station, iya ginpahayag nga base sa mga panaysayon sang mga kasilingan, tuman ka palangga sang iloy kag amay ang ila kabataan kag wala sang nakit-an nga rason nga hungdon ang sunog.
Ginpahayag man sini nga ginlaragway sang punong barangay kag mga residente nga mabuot ang padre de pamilya kag nagatutok gid sa trabaho para sa iya pamilya.
“Gahambal sila nga palangga gid sang pamilya ang kabataan, despite nga tatlo sa ila ang special child. Naka-witness ang mga pumuluyo kun ano ka palangga sang ginikanan ang ila mga bata,” suno sa hepe.
Pahayag pa sang pulis, wala sang record sa barangay ang pamilya kag wala man sang na-report nga may yara sila sang kontra nga amo posible matudlo nga suspek sa fire incident.
Nahibaluan nga ang nasunog kag napatay amo ang isa ka tuig nga bata kag magulang sini nga naga-edad sang lima kag apat ka tuig nga lunsay Persons with Disability (PWD). May mga samad man kag paso ang iban pa sini nga magulang nga naga-edad sang 12 kag walo ka tuig.
Sang tion nga natabo ang sunog, wala sa balay ang mga ginikanan bangud namilasyon sa namatyan nga ginabanta 200 metros ang kalayuon halin sa ila balay.
Ginapatihan nga ang dabok sa idalom sang hagdan ang ginhalinan sang kalayo. Wala man gilayon napalong ang kalayo bangud malayo pa ang bubon nga sarang makuhaan sang tubig.#
