ILOILO CITY – Grupo-grupo lang kag barkadahay ang ginahimo sang mga kabataan sa syudad kag indi dapat pag-iangot sa mga gang war.
Ini ang pahayag ni Nestor Canong, pinuno sang Task Force on Morals and Values Formation, kasunod sang duha ka separado nga rambol nga natabo sa Plaza Libertad kag sa Sunburst Park sa Iloilo City Proper sang nagligad nga semana kun sa diin may yara sang involved nga mga menor de edad.
Sa interview sang Bombo Radyo kay Canong, iya ginpahayag nga nagulpihan lang ang mga kabataan bangud malawig man nga tion ang ila gintinir sa sulod sang ila balay sa quarantine period.
Daw kaangay nga ginkurong ang mga kabataan suno sa iya gani gulpi lang nga nag-gwa ang “hyper-energy” sang gin-buksan na ang mga Christmas lights sa syudad.
“It was an isolated incident kag indi gang war nga nagadumtanay ang mga kabataan. It happened nga nabuy-an naton sila, and nagulpihan sila sa ila lagaw-lagaw, sadya-sadya, grupo-grupo, kag bonding-bonding, amo to nga sang nagkit-anay, nagkursunadahay.”
Suno pa kay Canong, may iban pa gani nga mga grupo nga may religious affiliation.
“Indi ko man na gusto gamiton ang termino nga gang, kay kun maghambal ka nga gang, may negative connotation.”
Sa subong, nagapasalig man ang natungdan nga padayon ang ila nga monitoring agud nga masaylo ang focus sang mga kabataan sa mas produktibo nga mga butang.
