ILOILO – Nagapanindugan Department of Public Works and Highways (DPWH) Region VI nga wala sang ghost projects sa Western Visayas.
Ini ang sabat ni DPWH Regional Director Lea Delfinado kasunod sang pahayag ni Presidente Rodrigo Duterte nga may nagakatabo nga lapnagon nga korapsyon sa nasambit nga ahensya sang gobyerno kag may kahilabtanan ang pila ka mga regional directors sa mga iregularidad kag sa mga substandard projects.
Sa interview sang Bombo Radyo kay Delfinado, iya ginpahayag nga indi makalusot ini nga mga ghost projects sa rehiyon bangud sang ginagamit nga geotagging technology nga makapauswag sang efficiency sa pagplano, budgeting, project monitoring, kag contract management processes.
Suno sa director, ang geotagged monthly progress kag completion ang required sa tanan nga mga proyekto kag lakip sa sini ang mga laragway nga may nagakaigu nga geotags.
Magluwas diri, aktibo man ang inspection halin sa central office ukon ang Quality Assurance Unit kag amo man ang monitoring sang Commission on Audit (COA).
“Wala sang ghost projects sa Region VI. Imposible nga makahimo sang ghost projects. Pero according sa presidente, may ara kuno. Te siguro kun may ara man gid, mga sagad-sagad na gid ina magdiskarte,” pahayag sang regional director.
Nagpasalig man ang natungdan nga pasanyugon pa gid ang monitoring sa rehiyon agud ‘wala sang makalusot nga korapsyon.’
“Kun may ara man kami madiskubrehan nga mga personnel nga involved sa corruption, te aton man ina nga aktuhan kag hatagan sang sanction if proven guilty,” suno kay Delfinado.
