Ginklaro ni Department of Education (DepEd) Secretary Sonny Angara nga wala sang na-report nga injuries ukon anuman nga kahalitan kasunod sang linog nga nagtay-og sa Laoag City, Ilocos Norte nga amo ang host sang Palarong Pambansa 2025.
Pasado alas dies kaina sang aga sang nagtay-og ang magnitude 5.2 nga linog sa La Union kag nabatyagan man sa kaiping nga mga syudad kaangay sang Laoag City kun sa diin masako sa pagpanghanda para sa opening ceremony sang hinampang.
Suno pa sa DepEd, napalapta na sang Incident Command Post ang mga personnel nagikan sa Bureau of Fire Protection kag Regional Safety Office agud nga mag-inspect sa playing venues amo man sa mga lugar kun sa diin nagatinir ang mga delegado sa hinampang.
Lakip man sa gin-check amo ang Ferdinand E. Marcos Memorial Stadium kun sa diin hiwaton ang opening rites karon sa gab-i. Sa stadium man patigayunon sa masunod nga inadlaw ang nagkalain-lain nga sport events kaangay sang football, tennis, athletics, kag swimming.
Ginpasiguro sang DepEd nga preparado ang ila nga Regional Incident Management Team kag ginasunod gid ang earthquake response protocols.
Sandig sa schedule nga ginhatag sang Schools Division of Ilocos Norte, alas otso karon sa gab-i ang keynote message ni President Ferdinand Marcos Jr. nga amo man ang pormal nga proklamasyon sang pagbukas sang Palarong Pambansa.
Nahibaluan nga bisan subong nga gab-i ang opening ceremony, magasugod ang regular sports sa Mayo 26 tubtub 30.
