JANIUAY, ILOILO – Wala ginalaoman sang amay sang dalaga nga ginhimuslan kag ginpatay sa Barangay Abangay Janiuay Iloilo ang madangatan sang iya anak.
Ang biktima amo si Ronalyn Bravio, 19 anyos samtang ang suspek naman amo ang iya pakaduha nga si Rhegie Levoit, 42 anyos.
Sa interview sang Bombo Radyo kay Rolando Bravio, iya ginpahayag nga kun nahibaluan lang kuntani niya nga may luyag si Levoit sa iya anak, wala niya tani ginpahanugutan nga magbakal sang habon ang iya anak sa guwa sang ila balay.
Suno sa amay nga Bravio, isa ka oras kag tunga nga wala nakapauli sa ila balay ang biktima sa diin kinulbaan na ini kag ginpapangita ang iya nga anak.
Pahayag niya, wala sang kapatawaran ang makahalanusbo nga natabo sa iya anak sa diin wasak ang ulo sini.
Sang iya makit-an ang sitwasyon sang iya anak nga may higot ang kamot, hawak, tiil kag may sako ang liog nga nakahigot sa payag, tuman ang kalain sang buot nga iya nabatyagan nga halos daw malipong siya sa brutal nga pagpatay kay Ronalyn.
Dugang pa sang amay, desidido ang ila pamilya nga magpasaka sang kaso batuk kay Levoit.
