Ginpatpat sang isa ka legal expert kag manunudlo sa Far Easter University nga si Atty. Josiah David Quising nga indi husto para sa international community ang pagdakop sang Estados Unidos kay Venezuelan President Nicolas Maduro.
Sa interview sang Bombo Radyo kay Atty. Quising, iya gin-athag nga wala sang kinamatarong ang isa ka estado nga mag-aresto sang isa ka lider sang lain nga pungsod bangud ginaprotektahan ini sang prinsipyo sang international law kag sovereign immunity.
Matabo lamang ang pag-aresto kun may yara sang klaro nga permiso ukon mandato halin sa nagakaigo nga international body.
Ginpaathag ni Quising nga indi pwede gamiton sang Estados Unidos ang ila domestic law agud i-justify ang hulag ukon himuon sini batok sa isa ka foreign leader.
Suno pa sa iya nga kinahanglan nga sundon sang US ang due process kag ang ginapatuman nga rule of law sa international level.
Ginpahayag pa sini nga ang isyu may kaangtanan sa economic interests, ilabi na sa oil industry.
Suno pa sa iya, wala man gintago ni anay US President Donald Trump nga may corporate kag economic nga intensyon ini sa likod sang pagkuha sini kay Venezuela President Maduro.
Dugang pa ni Quising, madugay na nga target sang US ang Venezuela.
Ginlaragway niya ini bilang porma sang imperialist aggression, nga nagalakip sang economic sanctions, political pressure, kag posible nga act of force, nga mahimo nga matawag nga act of terrorism kun basihan ang international law.
Ginpahayag man nga ang amo nga mga lihok indi dapat mangin normal ukon indi dapat pag-i-normalize bangud klaro nga paglapas ini sa layi.
Ginapanawagan man sini ang pagbutang sang mas daku nga pressure sa Senado sang Pilipinas kag sa iban pa nga international institutions agud masunod ang rule of law kag malikawan nga masundan ang kaangay sini nga hitabo sa iban pa nga pungsod.
