Ginpanindugan sang legal counsel sang isa indibidwal nga nagpasaka sang reklamo batok kay Jonas Bellosillo, anay Punong Barangay sang Simon Ledesma, Jaro, kag subong chief-of-staff ni Mayor Raisa Treñas, nga wala sang lamod pamulitika ang ila nangin tikang.
Ang reklamo natuhoy sa ginaalegar pagpanakit ni Bellosillo sa tagreklamo nga si alyas Julia upod ang iya mga kaupdanan kun sa diin gamit ni Bellosillo ang uluyatan sang silhig..
Natano ang ginaalegar pagpanakit sang Mayo 17.
Sa interview sang Bombo Radyo kay Atty. Danielle Naciongayo-Robles, abogado ni alyas Julia, iya ginpahayag nga personal nga desisyon sini ang pagpasaka sang kaso kag wala ini gin-impluwensyahan sang bisan sin-o.
Pahayag pa sini, matapos ang insidente may plano na kuntani si alyas Julia nga magkadto sa barangay agud mag-file sang complaint, apang ginpili sini nga hulaton anay nga makumpleto ang tanan nga kinahanglanon nga dokumento antes magpadayon sa pormal nga pagpasaka sang reklamo.
Pahayag pa ni Atty Robles nga sang Mayo 25, personal nga nagpakigkita si alyas Julia sa iya kag didto niya ginbilin ang orihinal nga kopya sang police blotter report kag medico-legal certificate.
Ginlaygayan man sini si Julia nga indi anay pagpakita ang police blotter report kag medico-legal certificate sa barangay samtang wala pa ini pormal nga na-file bilang reklamo agud masiguro ang husto nga pagproseso.
Gin-deny man sang kampo ni Atty. Robles ang pahayag ni Barangay Captain Amadeo Sultan nga ang nag-upod kay alyas Julia sa pagkadto sa barangay ang may koneksyon sa isa ka pulitikal nga grupo nga ‘𝒑𝒖𝒍𝒂𝒉𝒂𝒏’.
Suno pa sa iya, ang nag-upod lamang kay alyas Julia amo ang iya pakaisa kag utod, kag wala sang representante sang ano man nga grupo kaangot sa pulitika nga nagbulig ukon nagtulod sa iya nga magpasaka sang kaso batok kay Bellosillo.
Base naman sa medico-legal certificate nga ginpresentar ni alyas Julia, ginpahayag sang iya legal counsel nga ginahanda nila ang pagpasaka sang kaso nga slight physical injuries batok kay Bellosillo angut sa ginaalegar nga pagpanghampak niya sa grupo ni alyas Julia nga nagresulta sa mga lagob kag pilas sa ila lawas.
Samtang ginapadayon ang proseso, may yara sang ikaduha nga hearing sa Lupon sang Barangay sa Barangay Simon Ledesma, Jaro, Iloilo City, buwas, Hunyo 12, agud pamatian ang bahin sang duwa ka kampo.
