Wala sang bisan isa ka pulis nga nagpadulong sa balay sang Pamilya Bolante sa North Baluarte, Molo, Iloilo City umpisa sang naluthangan-patay ang 27 anyos nga si Karl Daniel Bolante sang ginpatigayon sang mga pulis ang drug buy bust operation sang Martes sang gab-i, Hunyo 29.
Ini ang suno sa iloy nga si Amalia Bolante, iloy sang napatay kag isa man ka Barangay Kagawad sa amo nga lugar.
Hugot sa gihapon ang panindugan sang iloy nga nasalabat lang ang iya anak nga si Karl bangud ang matuod nga subject sang operasyon amo si Dave Mendoza, 23, residente sang Rizal Pala-Pala 2, Iloilo City Proper.
Sa interview sang Bombo Radyo sa iloy, iya ginpahayag nga indi pa siya makakaon umpisa sang napatay ang iya anak ilabi na bangud nakit-an niya kun paano gintuwang-tuwangan ang bangkay sang iya anak nga daw ‘kaangay sang baboy’.
Suno pa kay Bolante, may mga istorya pa siya nga nabaton nga ginhal-id lang ang lawas sang iya nga anak sang ginbawian na ini sang kabuhi.
Indi man makumpirma ni Bolante kun ano ka matuod ini nga impormasyon apang nagalaum siya nga mangibabaw ang kamatuoran.
Antes kag pagkatapos sang operasyon suno sa natungdan, wala gid sang pulis nga nakapalapit sa ila nga barangay agud nga kilalahon ang identity sang iya nga anak.
Baliskad ang pahayag ni Bolante sa pahayag sang Iloilo City Police Office (ICPO) nga may imbestigasyon sila kag nagagwa nga konektado ang napatay nga si Karl sa subject nga si Mendoza.
Gin-abi-abi naman sang iloy ang pahayag sang Commission on Human Rights (CHR) Region 6 nga handa ang ahensya nga maghatag sang sang assistance paagi sa pagpatigayon sang motu proprio investigation kun magdangop sa ila ang pamilya sang biktima.
