ILOILO CITY – Wala sang ginapili nga edad ang coronavirus disease (COVID-19) kag ini ang kinahanglan hangpon sang mga pumuluyo sang syudad sang Iloilo.
Ini ang pahayag ni Iloilo City Mayor Jerry Treñas may kaangtanan sa resulta sang Random Access Consultants Incorporated (RACI) survey nga nagapakita nga madamo gihapon sa mga residente ang nagapati nga mga tigulang lang kag kabataan ang sarang matapikan sang virus.
Sa interview sang Bombo Radyo kay Treñas, iya ginpahayag nga apisar nagnubo na subong ang narekord nga kaso sang COVID-19 team sa syudad, naga-gwa man nga may yara sang mga positive cases sa mga tawo nga naga-edad 20-50 anyos.
“Waay ni sang exempted sa COVID. Bisan ano edad mo, malatnan ka. Ang cases ta recently indi na mga tigulang kag mga minors. Ang gagwa subong is between the ages of 20 and 50. We really have to take care of ourselves.”
Liwat man nga naghingyo ang alkalde sang bulig sa media outlets kag sa mga health practitioners agud mapasangkad pa ang kampanya kag mapahangop sa mga tawo ang mga minimum health protocols.
“Pareho sa inyo sa Bombo, daku ang responsibilidad niyo kay gapamati sa inyo ang tawo. We will continue to collaborate with radio stations which are also willing to collaborate with us for the good of the Ilonggos,” pahayag sang alkalde.
