Ginpasalig sang Department of Energy (DOE) sa publiko nga wala sang “red alert” warning sa power supply sa pungsod para sa bilog nga tuig.
Suno kay Energy Undersecretary Rowena Guevara, “yellow alerts” lamang ang ginalauman nga ipasaka sa nagkalain-lain nga bahin sang pungsod.
Ginapasaka ang red alert kun wala na sang bastante nga power supply nga posible maglab-ot sa outages ukon indi na gid available ang kuryente.
Ang yellow alert naman nagakahulugan sang manipis nga power reserves apang wala man nagakahulugan nga magluntad na ang outages.
Sa Visayas suno sa opisyal, wala sang yellow ukon red alerts sa adlaw, apang sa gab-i naman, lauman ang tubtub lima ka yellow alerts.
Ginpasalig man nga handa ang backups pananglitan maka-eksperyensya ang power plants sang forced ukon unscheduled outage.
Una na nga nagpaandam ang National Grid Corporation of the Philippines (NGCP) nga posible mapaidalon sa yellow alert ang bilog nga bulan sang Mayo kag posible maglala pa ang sitwasyon kun may matabo nga unexpected plant outages.
