Wala sang rekord sang daan nga hiligut-anon sa barangay ang suspek kag biktima sang pagpangluthang sa Brgy. Sto. Rosario-Duran, City Proper kahapon, Oktubre 25.
Sa interview sang Bombo Radyo kay Punong Barangay Oscar Catarata, iya ginpahayag nga sa iya pagkakilala sa suspek kag biktima, wala siya sang nahibaluan nga may yara ang mga ini sang daan nga away ukon hiligut-anon.
Suno sa iya, malinong kag wala sang gamo nga klase sang tawo ang biktima nga si Conrad Gabo kag wala man sang insidente nga nai-report sa ila nga nagapakita sang problema sa tunga sang duha ka persona.
Pahayag man niya nga wala sang may natabo nga komusyon sa tunga sang duha antes ang insidente.
Dugang pa, ginakabig man ni PB Catarata nga isa ka isolated incident ang pagpangluthang bangud malayo ang area sang insidente sa lugar kun sa diin ginahiwat ang aktibidad nga kabahin sang kapistahan sang nasambit nga barangay.
Matandaan nga magluwas sa biktima nga si Gabo, nasalabat sang bala kag ginbawian man sang kabuhi ang isa ka indibidwal nga nagabakal lamang sang fishball malapit sa area sang insidente.
Samtang ang suspek ang preso sa subong sa Iloilo City Police Station 1.
Padayon naman ang imbestigasyon sang mga otoridad agud mahibaluan ang motibo sa krimen.
