Wala sang na-monitor ang mga pulis nga may pamahog sa seguridad sa ikatatlo nga State of the Nation Address (SONA) ni President Ferdinand Marcos, Jr. sa Hulyo 22.
Gin-athag ini ni PNP public information officer Col. Jean Fajardo pila ka adlaw matapos natublag ang publiko sa statement ni Vice President Sara Duterte nga indi siya magtambong sa SONA kag gina-appoint niya ang iya kaugalingon bilang “designated survivor.”
Madamo ang nag-react sa amo nga pahayag ni Duterte bangud ini nga termino ang posible maangot sa mga senaryo kaangay sang mass casualty event.
Sa Estados Unidos sang Amerika, ang designated survivor amo ang tawo nga yara sa presidential line of succession nga ginapahamtang sa sikreto nga lugar kag separado sa iban nga officials nga nagatambong sa public event kaangay sang State of the Union Address.
Ini nga tikang ang ginahimo agud masiguro nga may continuity sa presidency PANANGLITAN ang presidente, vice president kag iban pa nga mataas nga mga lider nga yara sa linya sang succession ang mapatay sa terror attack ukon anuman nga sirkumstansya.
Apang suno sa PNP, wala sang dapat kabalak-an sa SONA nga hiwaton sa Batasang Pambansa Complex sa Quezon City sa masunod na nga semana.
Apisar nga wala sang na-monitor nga security threat suno sa natungdan, wala nagakumpyansa ang otoridad kag padayon gihapon ang intelligence gathering kag monitoring nga ginahimo sang security forces partikular sang Armed Forces of the Philippines.
Masobra naman sa 22,000 ka mga pulis ang magabuligay sa sini nga event kun sa diin sa sini nga numero, 6,000 ang ipadala sa vicinity sang Batasang Pambansa Complex.
