Ginklaro ni Philippine National Police (PNP) chief Police General Benjamin Acorda Jr. nga wala sang pagsulundan sa hanay sang kapulisan nga nagadumili sa paggamit sang bantog nga social media application nga TikTok.
Suno kay Acorda, mahimo ini magamit sang mga pulis sang pribado sa kondisyon nga wala lang sini ginahigkuan ang pangalan sang organisasyon.
Pahayag pa sini, gina-evaluate man nila ang pahayag sang sang militar nga may dala nga pamahog sa cybersecurity ang nasambit nga social media application nga ginhimo sang China.
“With regards to the company-issued cellphone, wala tayong policy pa diyan. With regards to paggamit ng TikTok privately, iyong ating personnel, as long as it’s not degrading our uniform, walang problema,” suno kay Acorda.
Antes sini, una nga ginpahayag sang Armed Forces of the Philippines (AFP) nga nagapatuman sila sang TikTok ban sa military personnel bangud sa kahangawa sa pamahog sini sa cybersecurity.
Buot silingon sang ban, indi pwede ma-install ang TikTok sa device nga konektado sa military network kag dapat nga wala man sang i-post nga magabutang sa seguridad sang kampo sa risgo.
Ini bangud suno sa militar, ang TikTok ang nagapangayo asng permiso sang tag-iya sang cellphone nga maka-access sa phone features kaangay sang camera, microphone, kag messages.
Sang Septyembre sang nagligad nga tuig, nagsiling ang National Security Council (NSC) nga ginatun-an sini nga i-ban ang TikTok sa tanan nga uniformed personnel agud malikawan ang “data leak.”
Antes sa Pilipinas, nauna na ang United States, India, kag Canada sa pagdumili sang amo nga Chinese company-owned TikTok sa government phones kag state workers bangud sa kahangawa nga gamiton sang Chinese government ang aplikasyon agud nga mag-espiya.#
