Nagsabat si Defense Secretary Gilberto “Gibo” Teodoro Jr. sa pagpamalabag sang China sa pagpadala sang Estados Unidos sang Amerika sang ila nga military assets diri sa Pilipinas.
“Wala silang pakialam ‘dun, bakit sila nagde-deploy din sa ibang mga lugar. Eh ano sa akin kung magalit sila?” kabahin sang sabat sang tiglikom sa ambush interview sa Camp Aguinaldo.
Dugang sini: “Ang importante huwag magalit ang taumbayan ng Pilipinas sa atin.”
Matandaan nga ang ginapamatukan sang China amo ang US deployment sang Typhon weapon systems kag high-precision anti-ship Navy-Marine Expeditionary Ship Interdiction System (NMESIS) launchers sa pungsod bangud suno sa ila, ginaguba sini ang kalinong sa rehiyon.
Abril sang ginkumpirma sang 3rd Marine Littoral Regiment sang US Marine Corps ang labing-una nga deployment sang NMESIS sa Pilipinas.
Ini nga system ang ginposisyon anay sa Northern Luzon kag sa Batanes Islands bilang kabahin sang 40th iteration sang tuigan nga Balikatan (Shoulder-to-Shoulder) military exercises sang Pilipinas kag US.
Makasarang ang NMESIS system sa pag-igo sa targets nga masobra 185 kilometros ang kalayuon paagi sa sea-skimming precision kag radar-evading stealth. Gindesinyo ini para sa coastal defense kag sea denial operations.#
