Apisar napaslawan ang Ilongga boxer nga si Irish Magno nga madala pauli ang isa sa mga medalya sa Tokyo 2020 Olympics, ginbatak niya sa gihapon ang kaugalingon sa paglaom nga indi ini ang pinakaulihe niya nga paghampang sa Olympiada.
Si Magno ang tumandok sang Barangay Tamu-an, Janiuay, Iloilo kag labing una nga Filipina boxer nga nag-qualify sa Olympics.
Sa exclusive interview sang Bombo Radyo kay Magno, iya ginpahayag nga bangud sa suporta sang iya mga kasimanwa nga Ilonggo kag pamilya, nalampuwasan niya ang kasubo sang ginlutos siya sa round of 16 sang women’s flyweight event sang 23 anyos nga Thai nga si Jutamas Jitpong via unanimous decision sang mga judges.
Gin-ako ni Magno nga posible gintun-an maayo ni Jitpong ang diskarte niya sa sulod sang boxing ring rason nga nangin madinalag-on ang tiglawas sang Thailand sa ila nga sambuwa.
Gin-ako man niya nga sang tion mismo sang iya kapyerdihan, wala niya napunggan nga mangin emosyonal sa kadismaya sa diin nag-abot sa punto nga ginkwestyon man niya ang iya kaugalingon.
Sa pihak sini, narealisar sang Ilongga nga indi lamang siya ang naga-isahanon nga boxer nga nagatiglawas sang Pilipinas sa Olympiada.
Ginpat-od man ni Magno nga indi ini ang iya pinakaulihe nga paghampang sa Olympiada sa diin madamo pa siya sang inug-compete sa mga masunod nga tuig tubtob sa 2024 Olympics.
Nahibaluan nga natalana nga magpauli sa Pilipinas si Magno kaupod ang iban pa nga tiglawas sang pungsod sa Agosto 9 sa diin pagkatapos sang iya mandatory quarantine, magapauli na ang atleta sa iya hometown sa Janiuay, Iloilo.
