ILOILO CITY- Ginsuspend sang Office of the Ombudsman ang walo ka board members sa Antique bangud sa pagpabaya sang mga ini sa P1-B budget sang kapitolyo.
Kalakip sa mga ginsuspend sang anom ka bulan amo sanday Senior Board Member Mayella Mae Plameras – Ladislao, Board Member Victor Condez, Board Member Egidio Elio, SP Alfie Jay Niquia, Board Member Rony Molina, Sangguniang Kabataan Provincial Federation President Kenneth Dave Gasalao, Philippine Councilors League President Plaridel Sanchez IV kag Liga ng mga Barangay President Julius Cezar Tajanlangit.
Sa resolusyon nga ginpagwa ni Ombudsman Samuel Reyes Martires, iya ginpahayag nga may bastante kag mabakod nga ebidensiya nga nagapakita nga guilty sa mga akusasyon batok sa ila.
Ini ang para sa grave misconduct, oppression, kag gross neglect in performance of duty.
Ginpasaka ang mga reklamo nga administratibo batok sa ila bangud sa hungod nga indi paghulag sa una nga supplemental budget nga ginduso ni Gov. Rhodora “Dodod” Cadiao.
Ang kabahin sang budget ang ginpain kuntani para sa mga proyekto sang solar energy sang walo ka provincial hospital pati na ang pag-install sang mga solar-powered street lights kag home solar system.
