ILOILO CITY–Patay ang walo ka bulan nga lapsag matapos gingolgulan sang liog sang iya man lang iloy sa Sitio Alang-alang, Brgy. California, Barotac Viejo, Iloilo.

Sa interview sang Bombo Radyo kay Police Chief Inspector Joven Arevalo, hepe sang Barotac Viejo Municipal Police Station, iya ginpahayag nga gingulgol sang 28 anyos nga iloy ang liog sang lapsag gamit ang pisaw kag gunting.
Nagaguwa sa pagpangusisa nga bag-o pa man ang insidente, nag-away ang mag-asawa bangud lamang sa naguba nga plastic cabinet.
Sang mga nakaligad nga inadlaw, namutikan pa sang bana nga indi mahim-os ang iya tiayon sa wala mahibalu-an nga rason.
Gintu-ad man sang bana nga nakapauli pa sang pila ka adlaw ang iya tiayon sa balay sang iya ginikanan sa San Rafael, Iloilo.
Nagapanguha sang utan ang bana sang ginpahibalo siya sang apat ka tuig niya nga bata nga mahulam ang iya iloy sang pisaw ukon ano man nga hinganiban.
Gilayon nga nagpauli sa ila balay ang bana kag nakita na nga yara na sa lababo kag dugu-on ang iya walo ka bulan nga lapsag samtang dugu-on naman ang baba sang iya tiayon.
Ginapahayag nga magluwas sa paggulgol, gin-inom pa sang iloy ang dugo sang lapsag.
Ginkustodiya naman sang Barotac Veijo PNP ang 28 anyos nga iloy.