Walo ka mga lugar sa Iloilo ang ginrekomendar sang Provincial Joint Security Command Center nga ipaidalom sa election areas of concern may kaangtanan sa nagahilapit nga Mayo 12 nga midterm elections.
Sa interview sang Bombo Radyo kay PCol. Bayani Razalan, director sang Iloilo Police Provincial Office (IPPO), iya ginpahayag nga ini nga mga lugar ang may yara sang armed threat kag may intense political rivalry.
Suno kay Razalan, may i-deploy sila nga Quick Reaction Team sa sini nga walo ka lugar para bantayan ang posible pagluntad sang ano man nga gamo antes ukon sa mismo adlaw sang eleksyon.
Gin-athag naman ni Razalan nga indi pa mabuyagyag ang walo ka ginatumod nga mga lugar.
Nahibaluan ang Commission on Elections, Philippine National Police, kag Armed Forces of the Philippines ang nagsugtanay nga ipasaka ang amo nga rekomendasyon sa Regional Joint Security Command Center nga amo naman ang nag-forward sini sa national committee.
Hulaton pa nga ang COMELEC Central Office ang magpagwa sang nasambit nga listahan sang walo ka mga lugar sa Iloilo.
