Dakop ang walo tanan ka mga motorbanca sa apat ka adlaw nga operasyon sang Iloilo Police Provincial Office sa ila padayon nga kampanya kontra iligal nga pagpangisda sa probinsya sang Iloilo.
Sa interview sang Bombo Radyo kay Plt. Col. Arnel Solis, Spokesperson sang Iloilo Police Provincial Office, iya ginpahayag nga sa bulig kag pagkoordinar sang mga kapulisan upod ang Bantay Dagat Task Force ila natigayon nga madakpan ang mga motorbanca nga naglapas sa ila nga pagsulundan.
Suno pa kay Solis, ini ginpangunahan sang Banate Municipal Police Station nga may 3 ka mga nadakpan, amo man ang 2nd Iloilo Provincial Mobile Force Company kag Ajuy Municipal Police Station nga may tig 2 ka mga nagkaladakpan, kag San Dionisio Municipal Police Station nga may ara sang 1 nga nadakpan.
Suno sa pagpangusisa sang mga kapulisan, wala sang permit kag mga nagakaigo nga dokumento ang mga nagkaladakpan, mga nagpangisda sa indi sakop nga teretoryo, kag mga nagpangisda sa ginadumili-an nga lugar ukon fishing Sanctuary.
Sa karun temporaryo pa nga impounded ang pipila ka mga nasambit nga mga motor Banca sa tagsa ka Bantay Dagat Task Force kag Police Stations kag nagapangatubang sa paglapas sang tagsa ka mga ordinansa ilegal nga pagpangisda.
Padayon naman ang Iloilo Police Provincial Office sa mabaskog nga kampanya kontra Iligal nga Pagpangisda agud maprotektaran kag maamligan ang dunang manggad sang mga kadagatan sa bug-os nga Probinsya sang Iloilo.
