ILOILO CITY – Indi matakos ang kalipay sang walo ka mga Overseas Filipino Workers bangud nakapauli na sila sa probinsya sang Iloilo matapos ang halos duha ka bulan nga pagka stranded sa Cebu City.
Sa interview sang Bombo Radyo kay Leonard Brasas, iya ginpahayag nga sa masobra duha ka bulan nga pagtinir sa Cebu City, halos maubos naman ang ila kwarta bangud sila mismo ang nagabayad sang tanan humalin sa pagkaon lakip na sa akomodasyon sa hotel.
Suno kay Brasas, makapila na ka bes nga gintinghuaan nila nga makig-angot sa Overseas Workers Welfare Administration apang daw kaangay nga ginapasa-pasahan lang sila kag subong lang nga bulan sila naakomodar sang maayo.
Ginpahayag ni Brasas nga sila na lang ang nagmato-mato nagproseso kun sa diin nagbayad sila sang P75,000 kag P10,000 kada isa agud lang matigayon ang ila pagpauli.
Sa pihak sini, nagapasalamat sa gihapon si Brasas sa Iloilo Provincial Government nga amo ang nagbulig sa ila.
Sa subong suno sa natungdan, ginahulat na lang nila ang resulta sang Polymerase Reaction Test antes makapauli sa ila balay.
