CALINOG, ILOILO – Wala nangin happy ang ending sang love story sang isa ka wanted person matapos gin-aresto sa adlaw mismo sang iya kasal sa Barangay Marandig, Calinog, Iloilo.
Ang arestado amo si alyas Nito, 29, laborer, residente sang nasambit nga lugar kay may kaso nga murder.
Sa interview sang Bombo Radyo kay Police Major Fernand Limbungan, hepe sang Calinog Municipal Police Station, iya ginpahayag nga isa si alyas Nito sa mga magapasakop kuntani sa mass wedding sa nasambit nga banwa.
Apang antes pa man ang iya kasal, gin-aresto ini sang mga pulis apisar nga naghingyo ang pamilya sini nga patapuson lang anay ang iya kasal.
Suno kay Limbungan, ang kaso ni alyas Nito ang nag-ugat sang natiruhan sini ang iya tiyo sang nag-agaway sila sang pusil.
Nahitso na ang kaso sa tunga nila sang pamilya sang biktima, apang napasaka na sa korte ang kaso tubtub nga gindagdagan siya sang warrant of arrest.
Sa subong, preso na si alyas Nito sa Calinog Municipal Police Station.
