ILOILO CITY- Ginpatpat sang isa ka human rights lawyer ang pila ka mga pamaagi para sa international community nga mapasabat ang Russia kag si President Vladimyr Putin bangud sa pagkomiter sang war crimes kag crime against humanity sa Ukraine.
Sa interview sang Bombo Radyo kay Atty. Jobert Pahilga, iya ginpahayag nga maathag ang paglapas ni Putin sa international law bangud sa pagpamatay sang Russian troops sa mga sibilyan.
Suno kay Atty. Pahilga, mahimo i-file ang kaso sa International Criminal Court (ICC)ukon sa United Nations General Assembly kag wala sang expiration ang pagpasaka sini.
Mahimo man mag-isyu ang ICC sang international warrant of arrest batok kay Putin kag sa mga suldado sini kag mahimo sila arestuhon sa bisan diin man sila nga parti sang kalibutan, ipaidalom sa trial, kag kun mapamatud-an nga guilty, sila ang presuhon kag pabayaron sang krimen nga ila nahimo.
Suno pa kay Pahilga, bangud nga universal crime ang nakomiter ni Putin, mahimo sa gihapon ini nga ma-prosecute bisan pa nga indi myembro sang ICC ang Russia.
Dugang pa niya, magluwas sa international community, ang pinaka-ideyal nga mag-initiate sini nga lihok amo mismo ang Ukraine.
