Magalunsar ang International Criminal Court (ICC) sang external investigation batok sa chief prosecutor sini nga si Karim Khan bangud sa ginaalegar nga sexual misconduct.
Suno sa korte, magaagi ini sa maid-id nga pagpangusisa bilang kabahin sang “fully independent, impartial and fair process.”
Nagpanawagan man ini sa tanan nga mga partido nga involved nga mag-kooperar gid sa korte.
Nagpaguwa man sang statement si Prosecutor Khan nga magapabilin siya sa iya obligasyon sa pagpanguna sa mga imbestigasyon sa ginaalegar nga war crimes lakip na sa Israel-Gaza conflict.
Ang tanan naman nga mga isyu kaangot sa imbestigasyon sa iya ang pangunahan naman sang deputy prosecutors.
Una na nga ginpanginwala ni Khan ang tanan nga alegasyon sa misconduct nga gin-report sa governing body sang ICC sang nagligad nga bulan.
Sang amo nga tion, nag-hingyo man si Khan sa internal oversight body sang korte nga imbestigaran man ini nga mga alegasyon.
Gin-insister man sini nga ang misconduct allegations batok sa iya ang kabahin lamang sang misinformation campaign batok sa iya opisina.
Nahibaluan nga si Khan ang nag-request sang Mayo para dagdagan sang arrest warrants sanday Israeli Prime Minister Netanyahu, iya defense chief kag pila ka Hamas leaders.
Ang ICC amo ang permanent court nga naka-base sa The Hague nga maka-prosecute sang mga indibidwal sa war crimes, crimes against humanity, genocide kag crime of aggression sa member states ukon ila nationals.#
