Makapila ka beses nga ginradyuhan sang People’s Liberation Army Navy (PLAN) sang China ang aircraft sang Philippine Coast Guard samtang nga yara ini sa Bajo de Masinloc.
Ang Bajo de Masinloc nga kilala man bilang Scarborough Shoal ukon Panatag Shoal ang nahamtang 124 nautical miles halin sa Masinloc, Zambales.
Sulod ini sa 200-nautical-mile exclusive economic zone sang Pilipinas sandig sa nakabutang sa United Nations Convention on the Law of the Sea (UNCLOS).
Suno sa PCG, sang amo nga tion, naga-conduct ang aircraft sang kinaandan nga Maritime Domain Awareness (MDA) flight.
Sa amo nga flight, na-detect ang indi awtorisado nga presensya sang maritime forces sang China sa teritoryo sang Pilipinas.
Lakip diri ang duha ka barko sang China Coast Guard kag duha ka warships sa idalom sang People’s Liberation Army Navy.
May yara man sang lima kag mga barko nga ginapatihan nga Chinese maritime militia nga malapit man sa Bajo de Masinloc.
Sang nagradyo sila sa Philippine aircraft, nagbalos naman ang aircrew kag nagpaathag nga ang ila ginahimo ang nagasunod sa UNCLOS, 2016 Arbitral Award, kag Philippine Maritime Zones Act.
Nahibaluan nga ginahimo ang aerial patrol para nga ma-monitor kag maproteksyunan ang Filipino fishermen kag ang marine resources, kag malantaw man ang illegal nga presensya sang Chinese maritime forces sa West Philippine Sea.
