Mabatyagan na ang water shortage sa Western Visayas sugod subong nga Oktubre suno sa Office of Civil Defense Region 6 ukon OCD-6.
Sa interview sang Bombo Radyo Iloilo kay Maria Christina Mayor, Information Officer sang OCD-6, iya ginpahayag nga base sa latest weather forecast, mahimo nga magpadayon ang epekto sang El Niño tubtob sa first half sang masunod nga tuig.
Suno kay Mayor, may pila na ka bahin sang Western Visayas nga nakabatyag sang dry spell, lakip ang Aklan, Antique, Capiz, kag Iloilo.
Iya man ginpahayag nga may mga lugar na nga nagapatuman sang water rationing, samtang sa Guimaras, may mga bubon naman nga nagamala bangod sa kakulang sang tubig.
Suno pa sa iya, mas malala ang Super El Niño kon ikumpara sa natabo sang 2024 kag samtang may mga lugar sang una nga wala naapektuhan, subong halos bug-os nga pungsod ang nagaatubang sang epekto sini.
Ginpahayag man ni Mayor nga ang mga Local Government Units ukon LGUs nagapreparar na sang suplay sang pagkaon kag tubig, kag nagapatuman sang mga polisa kag programa para sa mga mangunguma kag mangungisda nga mas dako ang posibilidad nga maapektuhan sang El Niño.
Ginaagda man niya ang mga pumuluyo nga magpreparar sang mga pasilidad ukon containers para sa pagtipig sang tubig kag maghinay-hinay sa pagkonsumo sang enerhiya, bangod mahimo man ini nga makadugang sa epekto sang El Niño.
Para naman sa mga mangunguma, ginapanugyan ni Mayor ang pagtanom sang mga El Niño-resilient crops ukon mga tanom nga indi kinahanglan sang madamo nga tubig, kaangay sang balinghoy, kamote, kag mais, bilang alternatibo sa humay.
