Nagpabutyag si President Ferdinand “Bongbong” Marcos Jr. sang kahangawa kasunod sang pag-aresto sa lima ka Chinese nationals bangud sa ginaalegar nga pagpang-espiya sa assets sang Philippine Navy kag Coast Guard sa Palawan.
Suno kay Marcos, nagahulat siya sa dugang nga mga detalye kaangot sa nangin aktibidad sang mga suspek ilabi na bangud ang iban sa ila ang madugay na diri sa pungsod kag nakapangasawa na gani sang Pinay.
“That’s why we arrested them. Of course, we are very disturbed by anyone conducting such espionage operations against our military,” pahayag sini sa ambush interview sa Pasay City.
“The investigative services are still developing more information to see exactly… what operations they have been doing while they have been here in the Philippines. Dahil ‘yung iba matagal nang nandito, nakapangasawa na ng mga Pilipina. Sleeper talaga. Yung tinatawag na sleeper,” dugang niya.
Ginmandu sini nga ipa-paathag sa Chinese nationals kun ano ang ila ginhimo bangud mahimo ini makatudlo sa iban pa nga posible i-check sang otoridad.
“Kailangan, kung sakali, baka naman pagka nakausap natin sila masabi sa atin baka meron pang mga iba na maaari nating puntahan, pag-explain-in kung ano yung kanilang ginagawa,” suno pa sa chief executive.
Matandaan nga sa kumpirmasyon sang National Bureau of Investigation (NBI), nagpatigayon ang Chinese nationals sang aerial surveillance sa Palawan, kag sunod nga nadakpan ang duha sa Ninoy Aquino International Airport sang Enero 24.
Ginsundan ini sa pagdakop sa isa ka suspek sa Binondo, isa sa Intramuros, kag arestado man ang ginaalegar nga lider sa Dumaguete sang Enero 25.
Gintumod man ang mga suspek bilang isa ka field commander, duha ka intelligence operatives, isa ka financier, kag isa ka member.
Ini nga operasyon ang kasunod pa gid sa nauna nga pagkadakop sa isa ka Chinese national kag duha ka mga Pinoy nga ginaalegar nga nagapang-espiya man sa importante nga assets sang Pilipinas.
May yara man sang tip nga nabaton ang NBI Cybercrime Division nga may grupo sang Chinese nga nagapakuno-kuno bilang mga product buyers nga masami makit-an sa Ulugan Bay, Puerto Princesa nga ginakabig man nga strategic naval location.#
