Nagdepensa ang Iloilo City District Engineering Office angot sa madugay na nga reklamo sang isa ka German National may kaangtanan sa ginapahayag ‘wala na-solusyunan’ nga pagbaha sa ila lugar sa Juntado Subdivision, Barangay Calumpang, Iloilo City.
Ang tagreklamo amo si Joaquin Triebel kag residente sang nasambit nga lugar.
Sa interview sang Bombo Radyo kay former Iloilo City District Engineering Office Head Engr. Rodney Gustilo, iya ginpahayag nga sang siya pa ang nagapungko bilang pinuno sang Engineering Office, nakapadulong na sa iya talatapan si Triebel.
Suno kay Gustilo, matapos napalab-ot sang German national ang iya concern, gilayon nga nagpadulong ang pila ka mga personnel sang Engineering Office sa Juntado Subdivision agud matsikyar ang problema.
Apang gin-ako ni Gustilo nga apisar makapila na sila nag-request sang pondo agud makaayo ang guba nga drainage system sang subdivision, indi ini ma-releasan sang syudad bangud indi sakop sang local fund sang gobyerno ang pagkaayo ukon pagpa-improve sa mga pribado nga propedad.
Ginapahayag nga humalin sang nagbiya si Gustilo sa iya posisyon bilang Iloilo City District Engineering Office Head, wala sa gihapon na-releasan sang pondo ang Juntado Subdivision.
