ILOILO CITY – Indi dapat pag-ibasol sa mga pulis ang wala nasolbar nga kaso sang pagpamatay sa syudad sang Iloilo.
Ini ang pahayag sang bag-o nga director sang Iloilo City Police Office nga si Police Colonel Uldarico Garbanzos samtang nagapasalig sa publiko nga nagasunod sa rule of law ang tanan nga police personnel sang talatapan.
Sa interview sang Bombo Radyo kay Garbanzos, iya ginpahayag nga ginasunod sang mga pulis ang mandato sang hanay sang Philippine National Police (PNP) — ‘to enforce laws and to protect lives’.
“Ang mandate namon is to enforce all laws and to protect lives and properties. We have rule of law nga gina-follow. Ginapahibalo ko sa aton nga mga pumuluyo nga ang ICPO ga-follow sa rule of law. Indi gid guro bagay nga duha-duhaan ang pulis nga responsable sa mga incidents nga kaangay sini [pagpamatay],” pahayag sang newly-installed ICPO chief.
Ginpahayag man ni Garbanzos nga KUN may pulis gid man nga may kahilabtanan sa krimen, ginapatuman ang nagakaigu nga pag-disiplina kag imbestigasyon.
“We are trying our best to conduct and investigation. Ang iban nga allegedly involved sila [pulis], I think the investigation is ongoing” dugang pa sang natungdan.
Una na nga nagpasalig ang bag-o nga director nga sa iya pagpungko sa ICPO, mas pasangkaron pa ang kampanya kontra sa mga krimen paagi sa quad concept nga ginabug-usan sang intelligence, operations, police-community relations, kag investigation.
