ILOILO CITY – Kinahanglan na nga mabuksan ang tanan nga establisimento bangud tuman na nga apektado ang ekonomiya sang syudad sang Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga tuman ka dako ang deperensya sang koleksyon sang syudad subong ipaanggid ang sang nakaligad nga tuig bangud sa ginapangatubang nga Coronavirus Disease 2019 (COVID-19).
Suno kay Mayor Treñas, kinahanglan sa gihapon nga hangpon sang publiko nga ang virus yara lang sa palibot gani kun wala man lang sang importante nga kadto-an, mas maayo nga magtinir na lang sa balay.
Nagbuhin na ang city government sang working days kag sweldo sang mga casual kag job hire — kun sadto P500 kada adlaw pa ang sweldo sang mga ini, sa subong P400 na lang.
Subong nga ginapa-idalom sa Modified General Community Quarantine ang syudad, 100% na sa mga empleyado sang gobyerno ang kinahanglan magbalik apang ang mga 60 anyos pataas nga immuno compromise ang “work from home” anay.
