Nagpaguwa sang statement ang China nga istrikto nila nga uyatan ang kaso sang tatlo ka mga Pilipino nga ila gin-aresto bangud sa ginaalegar nga pagpang-espiya.
Suno kay Chinese foreign ministry spokesperson Guo Jiakun, sundon sang judicial kag iban pa nga Chinese authorities ang layi kag protektahan ang kinamatarong kag mga interes sang mga personnel nga involved samtang padayon ang kaso.
“China’s judicial and relevant authorities will strictly handle the case in accordance with law, and protect the lawful rights and interests of the personnel involved,” suno kay Guo.
Kaangot ini sa ila report nga naguba nila ang “intelligence network” nga ila ginpahayag gintukod sang Philippine espionage agency.
Wala ginhingadlan ni Guo kag sang Chinese embassy in Manila kun sanday sin-o ang mga gin-aresto, apang kun basehan ang Chinese state-run media nga Global Times, ang mga pangalan amo ang David Servanez, Albert Endencia kag Nathalie Plizardo.
Suno pa sa Global Times, madugay na nagapuyo si Servanez sa China, kag gin-detain ini matapos pila ka beses nga nagpalapit sa military facilities nga amo suno sa ila ang rason kun ngaa nagduda ang Chinese authorities. Pahayag pa sang Chinese media, naga-trabaho man si Endencia kag Plizardo kaupod kay Servanez para sa miyembro sang “Philippine intelligence service.”
Base sa embahada sang China sa Manila, ang tatlo nga arestado ang lunsay mga residente sang Palawan.
Matandaan nga sang temprano nga bahin pa lang sang Marso, nag-report na ang provincial government sang Palawan nga tatlo sa ila nga mga residente ang gindakop sang Chinese authorities sang nagligad nga tuig bangud sa alleged espionage.
Suno anay kay Palawan provincial government board member Ryan Maminta, duha sa arestado amo ang former scholars sang Hainan Government Scholarship Program sa China. Ini nga programa ang parte sang sisterhood agreement sa tunga sang Hainan kag Palawan para nga makahatag sang scholarships sa 50 Palaweños sa Hainan Normal University halin sang 2018 tubtub sang 2022.
Gin-alegar nga nakapauli na ini nga mga indibidwal sa Pilipinas matapos nag-gradwar sa programa, apang ginpahayag nga nagbalik man sa China kag wala na nakapakig-angot sa ila pamilya diri sa Pilipinas.
Ginahulat pa ang mangin statement sang Department of Foreign Affairs (DFA), Department of National Defense (DND), National Security Council (NSC), Armed Forces of the Philippines (AFP), kag Philippine National Police (PNP) kaangot sa sini nga report.
Antes sini nga development, may mga Chinese nationals man anay nga nadakpan diri sa Pilipinas sa una nga quarter sang 2025 bangud sa ginaalegar nga pagpang-espiya man sa gobyerno kag militar sang Pilipinas lakip na sa assets sa West Philippine Sea.#
