ILOILO CITY – Nagpaandam ang weather agency sang Japan batuk sa heart-related illness bangud sang pagsaka sang temperatura tubtob sa 40 degrees celsius sa pila ka bahin sang pungsod.
Nagpagwa sang alert ang gobyerno nga nagasakop sa malapad nga areas sang eastern tubtob western Japan kag nagahingyo sa mga tawo nga mag-inom sang madamo nga tubig kag likawan ang paggwa agud nga malikawan ang heat exhaustion.
Ang record high sang pungsod ang nagdangat sa 41.1 C nga na-register sa Kumagaya, Saitama Prefecture sang 2018 nga nagpatas man sa Hamamatsu, Shizuoka Prefecture sang 2020.
Sa Martes, ginalauman nga magadangat sa tubtob 41 C ang tempertura sa Kumagaya, north sang Tokyo, 39 C sa Nagoya sa central Japan kag 37 C sa central Tokyo suno sa weather agency.
Sa 914 ka observation points sa bilog nga Japan, ang temperatura ang nagsaka sa 30 C ukon mas mataas pa sa 380 ka mga locations kag ang mercury ang nagdangat sa 38.3 C sa Kumagay kag 35.1 sa Tokyo.
Nahibaluan nga sa pila ka bahin sang kalibutan, na-eksperyensyahan ang heatwave nga ginkamatay sang madamo nga tawo kag nagtuga sang lapnagon nga wildfire.
