Ginpahayag ni Vice President Sara Duterte nga nagapati siya nga ginasaligan siya gihapon ni President Ferdinand ‘Bongbong’ Marcos Jr. apisar sang pila ka kontrobersyal nga isyu nga iya ginakaulamiran kag sang pakaisa sang presidente nga si House Speaker Martin Romualdez.
“We’re okay. I believe that I still have the trust of President Ferdinand Marcos Jr,” pahayag ni Duterte.
Ginsiling man sini nga ginatun-an sang iya nga opisina ang una na nagguwa nga huring-huring nga may ginaplano nga impeachment batok sa iya.
Photo: Speaker’s Office
Naglutaw ang amo nga rumor samtang nga ginalantaw man nga pag-crack sa coalition sang administrasyon nga ginabug-usan sang dalagku nga political parties kag ma-impluwensya nga mga pamilya.
“We are currently doing our due diligence about this one and we will release a comment [at the] appropriate time.”
Una na nga ginpahayag ni Romualdez nga wala sang tikang ang Kamara agud kakason sa posisyon ang bise-presidente.
“I’m not aware of anything… nothing filed, no news of that,” pahayag sang house speaker. Gindugang sini nga wala siya nakahibalo kun diin naghalin ang impeachment rumors.
Kabahin si Romualdez sa delegasyon ni President Marcos para sa anum ka adlaw nga pagbisita sa Estados Unidos sang Amerika. #
