Magapatigayon ang West Visayas State University-College of Communication sang ila ikaapat nga tuig nga Patubas Documentary Film Festival.
Ini pagahiwaton sa Byernes nga adlaw, Abril 24, 2026 kun sa diin igabida ang mga nagkalain-lain nga mga documentary films sang mga estudyante ilabi na ang mga nagakuha sang kurso nga Bachelor of Arts in Broadcasting bilang kabahin sang ila requirement sa kurso.
Sa interview sang Bombo Radyo kay Mary Kareen L. Gancio, Festival Director sang Patubas Documentary Film, iya ginpahayag nga bukas ang festival indi lamang sa College of Communication kundi pati sa external campuses man sang WVSU.
Ini nga inisyatibo ginapatigayon bilang pamaagi agud mahatagan sang plataporma ang mga dokumentaryo kag mga istorya sang komunidad.
Lakip sa iga-presentar sa nasambit nga festival amo ang mga dokumentaries nga nagahatag tingog sa nagkalain-lain nga sektor sang komunidad.
Isa na diri ang ginatig-uluhan “Sa Lugar Lang” nga nagasaysay sang kabuhi sang mga driver, samtang ang “Bolante” nagasubay sa kabuhi sang mga bolantero halin sa uma tubtob sa mercado kag iban pa nga mga istorya nga mapa-anggid sa karon nga sitwasyon.
Ini nga festival pagahiwaton sa FDCP Cinematheque Centre Iloilo kag bukas sa mga interesado kun sa diin may ara sang schedules nga igahatag sa gusto masaksihan ang mga ginpangabudlayan sang mga estudyante halin sa WVSU-COC.
