Tinguhaan sang Los Angeles Lakers nga mapatas sa 1-1 ang serye sa pag-atubang sini sa No. 1 seed nga Denver Nuggets sa Game 2 sang Western Conference Finals sang National Basketball Association (NBA) 8:30 subong nga aga oras sa Pilipinas.
Ginpromisa man ni Lebron James nga mangin desperado ang Lakers nga mas kay-uhon ang hampang sa Game 2 agud nga makabawi matapos ginlutos sang Nuggets, 132-126, sa Game 1.
Ginpahayag ni Lakers coach Darvin Ham nga kinahanglan sini nga i-“recalibrate” ang lineup bangud sa nakit-an nga size advantage sa starting lineup sang Denver Nuggets. Wala ginsapubliko sang coach ang paglain sa lineup sa Game 2 kag wala man sang na-signal nga game plan adjustments.
Apang may reports nga nagaguwa nga gina-konsiderar nga ibutang si Rui Hachimura sa starting lineup sang Game 2. Sa nagligad nga fourth quarter sa Game 1, matandaan nga yara si Hachimura sa court agud nga bantayan ang Nuggets superstar nga si Nikola Jokic agud nga ihatag kay Anthony Davis ang abilidad nga mag-contest samtang indi ini ang primary defender kay Jokic.
Patigayunon ang hampang sa Ball Arena, home court sang Denver Nuggets. #
