Gamiton ni Luka Doncic kag Dallas Mavericks ang home court advantage agud nga malutos ang pangayaw apang top-seeded nga Oklahoma City Thunder sa Game 6 sang Western Conference second-round series subong nga adlaw, Mayo 19.
Magasugod ang hampang 8:00 subong nga aga (oras sa Pilipinas).
Gina-uyatan sang Mavs ang lead sa serye, 3-2, kag pananglitan malutos sini liwat ang Oklahoma, diretso na ini sa conference finals sa ikaduha nga tion sa sulod sang tatlo ka seasons.
Apang kun matandaan, sa ila man home floor nalutos ang Dallas sang Game 4 kag nakabawi lamang kag nakuha liwat ang series lead paagi sa 104-92 nga kadalag-an sa Game 5 sa bulig sang 31-point triple-double ni Doncic.
Magapanguna sa Thunder si Shai Gilgeous-Alexander nga pareho kay Doncic finalist man sa voting para sa NBA Most Valuable Player (MVP) subong nga season nga sang ulihi nadag-an ni Nikola Jokic sang reigning champions nga Denver Nuggets.
Ang winner sa tunga sang duha ka team amo naman ang ma-atubang sa magadaog sa tunga sang Nuggets kag Minnesota Timberwolves pag-abot sa Western Conference finals.#
