ILOILO CITY – Temporaryo nga magasira ang Western Visayas Medical Center Subnational Laboratory (WVMC-SNL) kun weekends kag holidays.
Sa interview sang Bombo Radyo kay Dr. Stephanie Abello, chief pathologist sang WVMC-SNL, iya ginpahayag may mga schedule sila agud nga magsira man para makapauli sa ila pamilya kag makaselebrar man sang holiday season.
Ini agud ma-decontaminate suno kay Abello ukon matinluan man ang nasambit nga laboratory matapos ang masobra 250 nga inadlaw nga sila naga-obra kag wala sang pahuway.
Pahayag ni Abello nga sa Disyembre 19 tubtob 20 magasira sila lakip na ang holidays sa Disyembre 25, Disyembre 30 kag Enero 1.
Apang bukas man sila sa weekdays kag makabaton sa gihapon sang mga specimen.
Itugyan man sa Uswag Molecular Laboratory kag iban nga ospital ang mga specimen agud nga ma-akomodar ang tanan.
Suno kay Abello, nagalaum man sila nga gamay nalang ang tawo nga magapaidalum sa testing ilabi na sa holidays gani nga luyag man nila nga makapahuway kag makapauli sa ila pamilya.
Samtang, ginpahayag naman ni Jeck Conlu, COVID-19 Team Spokesperson, handa man nga magbulig ang Uswag Molecular Laboratory sa WVMC-SNL.
Sa interview sang Bombo Radyo kay Conlu, padayunon ang pagpaidalum sa reverse transcription polymerase chain reaction (RT-PCR) test sang tanan nga locally stranded individuals, returning overseas Filipinos, kag authorized persons outside residence (APORs) nga magabalik sa Iloilo City subong nga holiday season.
Ini ang base sa executive order nga ginpatuman ni Iloilo City Mayor Jerry Treñas.
Pahayag ni Conlu nga ang tanan nga urgent request sang pumuluyo sa WVMC-SNL, ila man pagasal-on.
