Napabilin sang Bagyo Basyang ang kabaskugon sini samtang nagahilapit na sa Caraga Region.
Sa 8:00 p.m. weather bulletin sang PAGASA, nakabutang nga ulihi nakit-an ang sentro sang bagyo sa kalayuon nga 115 km nasidlangan sang Hinatuan, Surigao del Sur.
Dala sini ang kabaskugon sang hangin nga 75 km/h malapit sa sentro kag pagmadlos nga tubtub sa 90 km/h. Nagahulag ang bagyo sa direksyon nga pa-nakatundan naaminhan-nakatundan sa kadasigon nga 20 km/h.
Nagapabilin naman sa Tropical Cyclone Wind Signal No. 1 ang bilog nga Western Visayas ukon ang Guimaras, Iloilo, Capiz, Aklan, kag Antique.
Sa forecast track, maga-landfall ang sentro sang bagyo sa Surigao del Sur subong nga kagab-ihon ukon buwas sa kaagahon.
Matapos makatabok sa Mindanao, magatuhaw ini sa Bohol Sea buwas sa aga kag maglabay malapit —ukon mag-landfall— sa Siquijor kag sa southern portion sang Negros Oriental sa buwas sang hapon ukon sa gab-i.
Sa buwas sang gab-i ukon sa Sabado sang kaagahon, magatuhaw ini sa Sulu Sea, kag magalaslas sa northern portion sang Palawan sa Sabado sang hapon tubtub sa gab-i.
Ginalantaw nga magahina ini kag mahimo nga low pressure area sa Sabado sang hapon ukon sa gab-i.#
