ILOILO CITY – Naglab-ot sa 216 ka panibag-o nga kaso sang COVID-19, 137 ka dugang nga recoveries kag apat ka dugang nga casualties ang na record sa Western Visayas.
As of September 15, naglab-ot na sa 7,955 ang kabug-usan nga COVID-19 cases sa Rehiyon 6 kun sa diin 3,423 diri ang active cases samtang 4,404 na ang naka-recover kag 124 ang ginbawi-an sang kabuhi.
Ini matapos nga sa 1,642 ka laboratory results nga ginpaguwa, 216 diri ang panibag-o nga COVID-19 cases, 5 ang nagpositibo sa repeat test kag 1,421 ang negatibo.
Kun pahat-pahaton ang 216 ka panibag-o nga kaso, 14 diri ang halin sa Aklan, 2 sa Capiz, 9 sa Iloilo, 80 sa Negros Occidental, 90 sa Bacolod City kag 21 sa Iloilo City.
Sa bug-os nga Western Visayas, ang Aklan ang may 37 ka COVID-19 cases, Antique nga may 35, Capiz nga may 203, Guimaras nga may 56, Iloilo Province nga may 633, Negros Occidental nga may 1,286, Bacolod City nga may 2,485, Iloilo City nga may 1,493, ROFs, LSIs kag APORs nga may 1,727 kag 38 ang nalakip sa Tagged to other regions.
