ILOILO CITY – Nalakip ang Western Visayas sa pito ka mga rehiyon sa pungsod nga may na-monitor nga presensya sang aktibo kag potential armed groups antes ang Barangay and Sangguniang Kabataan elections subong nga Oktubre.
Suno kay Philippine National Police chief Police General Benjamin Acorda Jr., ang iban pa nga mga rehiyon amo ang Region 1, Region 3, Region 5, Region 13, Cordillera Administrative Region, kag Bangsamoro Autonomous Region in Muslim Mindanao.
Ini ang ginalakipan sang 48 ka mga private armed groups kag 45 potential armed groups.
Bangud sini, nagmandu na si Acorda sa mga concerned regional directors nga pabaskugon pa ang kampanya batuk sa private armed groups agud nga indi na sila paggamiton sa mga iligal nga aktibidad may kaangtanan sa eleksyon.
Dugang pa niya, nakabaton sang report ang ahensya nga may pila ka mga elected government officials kag mga potential candidates ang may pamahog sa kabuhi antes ang pinili-ay.
Ginatinguha-an man sang kapulisan suno sa iya nga himuon ang tanan agud nga makahimo sang nagaka-igo nga tikang kag malikawan ang pagpang-atake ukon kinagamo batuk sa mga personalidad nakabaton sang pamahog.
Ang mga opisyal kag kandidato nga yara sa risgo ang kabuhi ang mahimo nga mag-apply para sa exemption sa gun ban ukon para sa dugang nga personal security nagikan sa Philippine National Police.
Pahayag ni Acorda, ang isa sa mga factors nga ginakonsiderar sa paghimo sang list of election hot spot areas amo ang political rivalry.
Suno kay Philippine National Police public information office chief Police Brigadier General Redrico Maranan, nagapatigayon na sila sang evaluation upod sa Armed Forces of the Philippines kag Commission on Elections.
