ILOILO CITY – Nagtukod sang grupo ang guidance counselors, registered psychologists kag mental health advocates agud nga mabuligan ang frontliners kag ang general public nga makatibawas sa negatibo nga epekto sang Coronavirus Disease 2019 (COVID-19).
Sa Good Morning Philippines program, ginpahayag ni Francis Ray Subong, registered guidance counselor kag Board of Director sang Philippine Guidance and Counseling Association, nga naghugpong ang licensed mental health professionals kag advocates gikan sa Capiz, Iloilo kag Negros Occidental para sa pagbaton sang online inquiries tuhoy sa mental health needs.
Suno kay Subong, ang Western Visayas Psychosocial Support for COVID-19 ang nagatanyag sang libre nga psychosocial support services, online counseling kag referral sa iban nga mental health professionals depende sa ginakinahanglan sang kliyente.
Ang serbisyo nga ginatanyag sang nasambit nga grupo suno kay Subong ang nasanto Code of Ethical Standards sang tagsa ka medical professional.
Agud nga maka-avail sang libre nga serbisyo, mahimo nga magpakig-angot sa Facebook Page nga Western Visayas Psychosocial Support for COVID-19 ukon i-type ang facebook.com/westernvisayas.psychosocial.
Sa subong suno sa natungdan, wala pa sang available hotline ang Western Visayas Psychosocial Support for COVID-19 magluwas lang sa Facebook Page.
