Mabug-at kag may-unod ang ginbuy-an nga pamangkot ni California Governor Gavin Newsom matapos ang pagkapatay sang siyam ka tawo sa rail yard sa San Jose.
Suno sa gobernador, ano ang nagakatabo subong sa Estados Unidos?
Ini bangud 68 na ang narekord nga mass shootings sa pungsod sa sulod lang sang duha ka bulan base sa data sang Gun Violence Archive.
Kahapon, isa ka transit worker ang nagpalupok sang armas sa diin siyam ka tawo ang patay lakip na ang gunman.
Lakip man sa siyam ka mga napatay amo ang Filipino nga si Paul Delacruz Megia, 42 anyos.
Ginkilala sang California law enforcement officials ang suspek nga si Samuel James Cassidy, 57, isa ka maintenance worker.
Natabo ang pagpang-atake samtang nagahanda ang mga dispatchers kag maintenance workers nga magbukas ang Santa Clara Valley Transportation Authority.
Nagmandu naman si US President Joe Biden sa Congress nga himuan sang pamaagi kun paano masolbar ang gun violence.
Gin-athag sang kapulisan nga wala sila nakabayluhanay sang lupok sa gunman kag nagapati ang mga ini nga mismo ang suspek ang nag-utas sang iya kabuhi.
